Un villancicu pal añu nuevu

Tamos a les puertes de la navidá y nun hai otra que ponevos un cantarín navidiegu.
Esti quiciaves ye ún de los más conocíos, pol paisanu que lu canta, Victor Manuel, y porque d'aquella tuvo una tirada bien grande y sonó muncho pela radio.

Nun ye que n'asturianu nun haiga villancicos, la verdá ye que hai, y munchos, son casi toos tradicionales que se cantaben nos pueblos pa pidir el guilandu, asina que son conocíos con esi nome (ye por eso que cuando entrugais a los güelos por villancicos vos canten los pexes nel ríu o 25 de diciembre.... que son modernos y castellanos) como paez que tolo que vien del pueblu y nun lleva nin pandereta nin neños cantando con un gorru de papá noel nun val, ye triste, nun ye prestoso o nun ta de moda (¿cuándo tuvieren los villancicos de moda?) pues nun hai casi naide que puea cantar un villancicu tradicional.
Pa que conozáis lo que hai y lo que de verdá ye nueso equí vos dexo les carátules de los discos de guilandos y villancicos tradicionales
  



XERA:   Propóngovos qu'andéis a la gueta d'estos cantares y espetéis n'edmodo dalgún villacicu o guilandu qu'alcontréis pela rede; ponéi la lletra (espero que n'asturianu) y mirái a ver si topáis tamién videu. Una pista Nuberu, que ye un grupu perconocíu, tien un discu con esti tipu de cantares ...

Anda-y a la gueta tamién de dalguna tradición asturiana pa estes feches a parte de les casadielles, claro, desplicáila y poner dalguna semeya

Ánimu, bona navidá y feliz entamu d'añu 2015

Ún de los mios grupos preferíos




Esti ye ún de los mios grupos preferíos. Ye de música folk y tienen una pila de trabayos espublizaos;va sonavos porquevoi ponevos una esbilla del so discu "YÁ" en clas pa que afiléis la oreya.

 Tienen espublizaos dellos discos "Tierra" "yá" y el so discu d'entamu col mesmu nome que'l grupu "Felpeyu"

Son un grupu de Xixón que ta iguáu  por 6 rapazos que lleven munchos años trabayando pola música del país y tocando en munchos sitios per Asturies pero tamién pel mundu alantre, llegaron hasta Australia. Esta semeya ye de la presentación del so caberu discu "Canteros" y como son un pocu ciquitrinos ficieron esta presentación que vos dexo nesti enllaz a youtube.


Dende llueu recomiéndovos que los sintáis porque son prestosos y tan faciendo de la música folk asturiana dalgo novedoso que tien puxu tanto dientro como fuera de les nueses llendes.

Presentámonos

Hola a toos, seyáis bien afayaos nesti sitiu de la llingua asturiana del IES Valle d'Ayer.

Esti blog ta de mano del profe de llingua, un rapaz mui esmolecíu pol enseñu de la llingua y  que-y presten muncho les nueves teunoloxíes. Quier amosar el trabayu fechu polos alumnos del institutu nes clases de llingua asturiana, asina que van dir apaiciendo equí una riestra d’enllaces a blogs y publicaciones que vamos dir faciendo a lo llargo d’esti cursu.

Empobinámosvos a que lu sigáis y nos dexéis los vuesos comentarios.
Un saludu.